على مدخل بلدنا .....لمحت ابليس

لمحت ابليس ...
وف ايده استماره !!
قولتله على فين ؟!
قالى بص ....
يا هجره ....... يا اعاره !!
ياعم زهقت ... كفرت
الاقيش معاك سيجاره !!!

انا انتهيت خلاص !
لا نافع وسواس ولا خناس !!
ولا ليا عيش وسط الناس !!!

دى عالم مجرمين ..!
عندكوا فايض فى الفساد ...
فى كل البلاد ....
ومش محتاجين شياطين !!!

مليش عيش فى البلد دى

بقالى سنين عاطل !!!
وانتوا بتعرفوا تقلبوا الحق...

.........
باطل ....!!

وتسلكوا القاتل!!
وتمشوا فى جنازه المقتول.....
ومفيش مشاكل !!!

ياعم ده انا بقيت اوسوس....
بالمقلوب
واقول للحرامى......
كفايه بقى وتوب !!
انت حتعمل كل الذنوب ...!
لوحدك
وانا ..... ابليس
اشتغل .... واعظ !
ولا كمسارى فى اتوبيس !!!

ياعم ده انا زمان كنت استنى ....
حد ينسى يسمى ...
وهو بياكل لقمته ..!
دلوقتى كل اكلكم ملوث
وبصراحه
الواحد خايف على صحته !!
ده مفيش ضمير اساسا ....
عشان اموته !!!
وكل واحد بمزاجه .....
خربانه زمته !!

ياعم ده كل حاجه ...
اتسرقت !!
وكده الاجيال الجديده م الحراميه .....
اتظلمت !!!

ياراجل...
ده من كتر ما لطشت معايا....!
خرجت فى مظاهره مع الناس اللى بتقول....
.....

كفايه... !!

وبرضه مفيش فايده