رساله من طالب القرب

من طرف **ادهم مصر** الأربعاء ديسمبر 16, 2009 10:38 am

البت وزه بقت مزة عروســــــه يا ناس
ولما اشوفها وكانـي شارب 100 كاس
ومن جمالها انا قلت هاحبها وخـــلاص
واللي في نصيبي هيجي يوم والاقيه

هاكتب رساله اوصف فيها احــــوالي
واقول يا وزه مافي غيرك هيحـــلالي
اه لو توافقي هاجيلك بكرة مع خالي
غلبان وحبك و ياريتك تحنــي علـــيه

ومسكت ورقه وقلم وقعـــدت جنب الـــزير
الفسحه عندي كبيرة مفروشه والله حصـير
وفضلت ارتب في افكــــاري وهي تطــــير
محتار وقلمي غلب مش عارف اكتب ايه؟؟

سميت وقت في البدايه ســـــــــــــلام
لابحب اكــــــتر ولا بعرف كــلام افــــلام
انا مرة شفتك ومن يومها ما بعــرف انام
ماتستعجليش ولا تقولي دا يطلع ايه؟؟

انا اصلي شاري وعايز البيت من بابه
ومن الاصول ناخد اذن اصــــــــــحابه
وابن الاصول بيبــعد اي شــــي عابه
مش كـــــــــــده بردو ولا رايك ايه؟؟

انا اسمي احــــمد قاصد كريم حسنين
قطر الجـــــــــواز فاتني بقــــاله سنين
وسني يعني ثمانيه فوق الالثـــــلاثين
ميسور وراضي بس انتي ترضـي عليه

البيت دا ملكــــــي وعندي 11 فدان
وشغلي كله وعيشتي في الغيطان
دي دعوة امي يذيدك كمان وكـــمان
ماهو السعيد اللي امه ترضـي عليه

شبكه ومهر وشقه زي مــــا تقولي
واختاري بيني وابن العمـده مدبولي
ومفيش محال دوم انتي تكوني لي
انا بس حابب اعـــــــــــرف رايك ايه

واخــــيرا هقــــــولك يا وزة اتاني
لو حتي شهر انا بردو مســـــتني
ويارب ردك يوم يجيلي يفرحنـــي
ادي جوابي ومستني تردي عليه

وقلت اخرج عشان ابعت لها المرسال
وبالي رايق وحالي والله عال العــــال
الشارع اسكت هس ومكرفون شغال
طبل ومزيكا الله هو فيه ايه؟؟؟؟؟؟؟؟

وشفت عقد النور عند الحبايب بان
انا قلت يمكن طهور ولا فرح لجيران
مفيش مشكل مادام مفيش احزان
ماهو اصل لو فيه انارايح اعمل ايه؟

هيصه وناس يااربي كــــل دي زحمه
واكل موجود والناس داخله ع اللحمه
هجوم فدائي هجوم عالحم بلا رحمه
سالت واحد وقالي الهيصه تطلع ايه

يا سيدي يا محترم الفرح دا لوزه
اتاري غيري شافهاشاف انها مزة
اروح لبيتنا ولا اطلع علي الغرزه
محتار وزعلان طب بس اعمل ايه

مشيت اصبر نفسي من قله الحيــــــله
واقول جــواز وبـــــتاع يا واد بلا نيلــــــه
دي حتي وحشه وخشنه وسوده وتقيله
بضحك علي نفسي امال راح اعمل ايه؟؟

عملت شاي وشربته احســــــن من المقلب
وشغلت نفسي بحاجه ماهو الفاضي بيتعب
واحلي شي اعمــــــــــله امسك قلم واكتب
ادي الحكايه شفتم جرالي ايه