اقتراح من أجل البلدة

أقترح بان نستعرض مشكلة من مشكلات بلدتنا الحبيبه ( ميت مرجا ) تحديدا
ونقوم بعرض كل الحلول الممكنة
ثم نكلم المسئولين عنها ومن ثم الكل يشارك في المنتدى والمسئولين يعرفوا اننا مجتمعين على رأي واحد
والحمد لله هنا كثير من الاعضاء المسئولة في البلد
أرجو الرد

فكره جيده بس فى منتدى اصلا باسم الشكاوى ودا خاص بشكاوى اللد بس الاعضاء مفكرين انه خاص بمشاكل المنتدى وشكرا لك استاذنا الفاضل على وقتك الثمين الذى تمنحنا ايهاه وافكارك الرائعه كمان

فكره سليمه وسديده


يا


Teacher


وممكن نناقشها


في منتدي الحار

سوري يا جماعه


غلطه


مطبيعيه


وكلنا معرضين ليها





منتدي الحوااار

لا يا جماعه منتدى المشاكل دا خاص بمشاكل البلد

شكرا على الافكار الجامده دى
بس نتمنى التنفيذ من قبل المسئولين

برافو عليك يا تيتشر
وخلينى ادلوا بدلوى فى مجال الاقتراحات
عاوزين ننقل المقابر بتاعة البلد هنااااااااك وطى السكة الحديد ونستغل مكانها فى مشروع حضارى يفيد البلد كلها
أما عن الرفاة بتاعة أجدادنا - رحمة الله عليهم فيمكن نقلها وخاصة أذا تم تصميم المقابر الجديدة على تبة عالية تمنع تواجد المياه الجوفية
أما عن مكان المقابر فيمكن تأسيس شركة مساهمة من أهل البلد مثلا السهم بـ 100.00 أو 200 جنيه شريطة ألا يحظى أى شخص بأكثر من سهم واحد ومن ثم يتم تجميع مبلغ لا بأس به من كل البلد يكفى لشراء جوز فدادين ولا ثلاثة للترب الجديدة أما بالنسبة للترب الحالية فممكن مثلا أن يقام مول على أوسع نطاق على مساحة المقابر كلها يحتوى على محلات للجملة لجميع السلع على ألا يتم إيجارة إلا للمراجواية ومن ثم ممكن لهذا المكان أن يكون فيما بعد مركز تجارى رائد على مستوى المنطقة كلها والتجربة أثبتت ذلك بمحلات كمسيونات الخضار
وأكيد أجدادنا مش هزعلوا منا لما يشوفونا بنعمل مستقبل لأولادنا
فرص عمل - فتح باب رزق - تجميل - مظهر حضارى - رقى - عدالة فى التوزيع
لو أن هذا المشروع يناقش بمحمل من الجد . . ما ربما يكون بمثابة طوق النجاة للمرجاوية من السنوات العجاف القادمة والتى لن تستثنى أحدا . . والله المستعان

انا معاك ياعلى

واضح أن العظام مازالت عزيزة علينا بدليل أنه لم نتلقى من التعليقات على المشروع إلا القليل
عموما وأن كان أصابع الاتهام تشر إلى من البعض بالجحود نظرا لطرح هذا الموضوع فتلك نظرة قاصرة
فمن المعلوم لدى الجميع أنه إذا مات ابن ادم انقطعت علاقته بالدنيا إلا من ثلاث
أما عن الجسد فمآله أن يصبح باليا والعظام ستكون ترابا فلماذا لا نستفيد بالموقع للأجيال القادمة
ثم أن تلك الفكرة قد طبقت أكثر من مرة فى بلدنا الحبيب بدليل أنه إذا تمت أعمال لحفريات بجوار الشيخ محمد عبد القادر ستوجد رفاة موتى وبالفعل أثناء حفر الجامع الكبير وجدت بالفعل رفاة موتى أيضا دليل على نقل المقابر أكثر من مرة
أما عن الأجداد عليهم رحمة الله فالقبر ليس مستقر ومستودع وإنما وجود أرواحهم الطاهرة حاليا فى اللوح المحفوظ
نسأل الله رب العرش العظيم أن يسكنهم جميعا فسيح جناته ويرحم امواتنا وأموات جميع المسلمين
وننتظر الرد . . . شكرا

شكرا للمكرم المشرف العام انه قد تفاعل مع المشروع
وأنه سوف يعرضه على المسئولين
ولكن . . .
إن لم يكن المشروع مطلب جماهيرى لن يدخل فى حيز التنفيذ
لذا نحن الآن فى مرحلة من المراحل المتقدمة عن مرحلة أخذ تقرير من رئيس الوحدة الموقر
نحن فى مرحلة استقصاء واستبيان ولو على مستوى الأعضاء المشاركين بالمنتدى
وعليه أطلب طرح الموضوع للتصويت من قبل الإدارة
وشكرا

جارى الاتصال

فكرة كويسة وكانوا طرحوها زمان بس المشكله في موضوع النقل لإن محتاجين مساحة أكبر والأراضي دلوقتي مولعه نار ومحدش بيفرت فيها بالساهل عموماً الفكرة كويسة قوي لو دخلت حيز التنفيذ

يعنى الموضوع نام ومحدش علك عليه ؟
صدقونى المسألة مش مسألة نقل ترب ومكان فاضى هيتم عمل شوية محلات فيه وبس
أنا من رأى أن تكون شركة مساهمة قانونية قائمة على استثمار المكان وهو دا الجديد فى الموضوع
ما ربما قد تم سياق الموضوع من قبل على أساس عمل مدرسة أو معهد دينى أو مساكن شعبية ولكن كل هذا من قبيل الاستهلاك بينما نريد استثمار المكان فى مشروع تجارى انتاجى فلو أمكن يكون فيه جزى من المكان يتم تخطيطه على أساس منطقة صناعية ويكون فيه بعض الصناعات القائمة على منتجات الخضار وتعبئته ويكون فى الشركة اسطف تسويق لكل المنتجات سواء التجارية أو الصناعية
يعنى دى شوية أفكار مشوشة بس ممكن تتبلور والمساحة تترفع ويتعمل دراسة جدوى لمشروع كبير ويكون من أول مشاريعه شراء 3 فدادين لعملهم مقابر جديدة وعمل تبة تراب كبيرة فيهم بحيث تكون الترب أعلى من مستوى الأراضى لتفادى مشكلة الترب الحالية
تخيلوا كام فرصة عمل سوف يمنحها هذا المشروع الجبار لأهل البلد
تخيلوا كام بيت هيتفتح وكام شاب هيتجوز
وممكن كمان يتم تخصيص جزء من الأرباح السنوية للمشروع قبل توزيعها على السادة المسامين - يتم التفاق عليه مسبقا مثلا 10 % من المكسب لعمل أى مشروع خيرى بالبلد كل عام
أنا مش عارف محدش بيشارك معايا ليه فى طرح الأفكار لدراسة هذا المشروع مع أنى شايفه أنه يستحق الاهتمام أكثر من ذلك
منتظرين المشاركات

الاخ على
نحن فى انتظار الرد على هذا الموضوع من السيد رئيس الوحده المحليه

الشكر واجب للسادة / الوحدة المحلية ولسعادة رئيس الوحدة الموقر على الاهتمام
وهذا ليس غريبا على وحدتنا المحلية ورئيسها فى ظل النشاط الملحوظ الحرص على الصالح العام
وقد أصابت مشاركة الوحدة المحلية وأفاضت فى الشرح والتعريف
وواضح أن الفكرة قد لاقت قبول مبدئى ولكن المشكلة على حد وصف المشاركة تكمن فى التنفيذ
فوصف المشروع بالمكلف وصف صائب حيث أنه لن يؤتى ثماره إلا على المدى البعيد وخاصة أنه يوجد فجوة زمنية ما بين انشاء المقابر الجديدة وايقاف الدفن فى المقابر القديمة وهى العشر سنوات ولكن المشكلة ليست هاهنا
المشكلة هى ما ذكر بمشاركة الوحدة المحلية فى كون المقابر ملك لوزارة الصحة والوحدة المحلية
أيعنى ذلك أنه فى حال النجاح فى تأسيس شركة مساهمة من أهل البلد ويتم شراء أرض جديدة لمقابر جديدة من أصل المبلغ المجمع من المساهمين لن تؤول ملكية المقابر القديمة لتلك الشركة وتكون ملكيتها للحكومة - عفوا لوزارة الصحة والوحدة المحلية ؟
إذا كان ذلك فاسمحوا لى يجب على الحكومة آن ذاك دفع مبلغ أرض المقابر الجديدة لطالما أنها ستحتفظ بملكية أرض المقابر القديمة
ثم أننا نريد تنفيذ المشروع تحت مظلة شعبية للشركة الأهلية المكونة من مجلس إدارة مختار من أعضاء الجمعية العمومية للمساهمين ولا نريد تنفيذه عن طريق الحكومة فلا يخفى على الجميع أن اتجاه الحكومة من الخصخصة منافى لاتجاهات المشروع وتحمل تبعيات إدارته وتشغيله أى انه إذا تم تنفيذ المشروع عن طريق الحكومة سوف يقتصر المشروع على نقل المقابر وإحلالها بمشروع من مشاريع الدولة الحالية مثل حديقة للطفل أو مكتبة والقراءة للجميع واذا تعاظم سوف تكون مساكن شعبية ونحن لسنا فى حاجة لمثل تلك المشاريع نحن نريده مشروع تجارى ونكون نحن القائمين على إدارته
ثم أننا نريد تملك أرض المشروع باعتبار أننا سوف نقوم بالصرف عليه وتحمل تكاليف لن تاتى ثمارها إلا بعد 12 أو 13 سنة
ثم الأهم من ذلك أن كل عائلات البلدة سوف تتحمل تكاليف إضافية وهى اعادة انشاء مقابر جديدة على الأرض المشتراة والمخصصة للمقابر
وإلا. . . فلا داعى لتحمل كل تلك الأعباء إذا لم يكن ما يعود بالنفع المباشر على أهل البلدة
وشكرا

احم احم هو مفيش جديد ولا ايه يا جماعه ؟؟؟؟؟؟

يعني هيه مشكله البلد المقابر ؟؟

جت علي المقابر ووقفت يعني ؟؟

ما فيه مشاكل كتيييييييييير

1 - من وجهي نظري المقاهي اللي في مدخل البلد اللي مخليه شكل مدخل البلد مقزز

2- مشكله الطريق اتجاه واحد فاقترح ان يتفصل الي اتجاهين واحنا عارفين ان فيه طلبه مدارس وكده والحوادث اللي بتحصل

3- مشكله الجامع الكبير وادارته اللي خلت الناس هجروا الجامع الكبير ان المفروض يكون هوه الجامع المحبب الينا جميعا

4- مشكله الموالد والحاضره في بلدنا الحبيب واللي بيحصل فيها فضائح وميت مرجا هيه القريه الوحيده تقريبا في الخط اللي لسه بيحصل فيها هذه الخرافات

و و و يعني نركز علي المشاكل المهمه

فيه بعض الحاجات الكويسه حصلت في البلد فيارت نطور بلدنا وننهض بيها اكتر

استاذ ابراهيم المحترم
بعد التحية
لم يقف التفكير على مشكلة المقابر فحسب
بل نحن مع سعادتكم يوجد مشاكل أخرى كثير كما تفضلت بالذكر
وحتى لا تأخذ الأمور على علتها
فانسى موضوع المقابر
وآتنا بمشكلة من المشاكل سالفة الذكر وحللها واطرح الحلول البديلة من وجهة نظر سعادتكم ونحن معك مشاركين بآرائنا المتواضعة بكل امانة فأنت قد طرحت مشاكل فعلا غاية فى الأهمية ولكن ينقصها التحليل ونحن نشتاق لسماع وجهة نظركم المقيمة لدينا
شكرا

مشاكل اية ياجدعان البلد ذي الفل لكن العيب عند الناس اللي في البلد

فكره حلوه اوى ولازن نتناقش فيها ونرى تعليق الاعضاء عيها
يلا يا جماعه الى الرقى بالمنتدى بتاعنا احنا كده والله هنطور
تحياتى لكم
القلب المفقود

والله ياجماعه انا ماليش دعوه بحكاية نقل المقابر ده كلام ناس كبار وانا ما افهمش فيه .............................المشكلة عندي في ايه؟؟؟؟؟؟؟؟؟؟؟؟؟اولا ادارة الجامع الكبير فعلا اللي طفشت الشباب والاطفال وماعدش حد بيصلي هناك غير عمال المسجد ربنا يكون في عونهم طبعا .......ولازم اللي يمسك الجامع يكون علي قدر كبير جدا من الثقافه الدينيه مش خطبه واحده طول السنه وطبعا تكون ثقافته علي مستوي عال جدا وشامله مش دينيه بس ويكون اسلوبه بسيط ويعمل باللي بيقوله مش يخطب من هنا وهو طول النهار بره والادان يأذن وهو لسه ماشي في الشارع والصلاه تخلص وهو يدوب بيفكر يروح يصلي ولا يكمل مشي واستغفر الله العظيم بقي انا مش بجيب في سيره حد واللي علي راسة بطحه بقي يعمل ايه؟؟؟؟؟؟؟؟؟؟؟؟؟؟؟؟؟؟؟؟؟؟ احنا عاوزين امام بمعني الكلمه مش حد كده وخلاص دي مسؤليه امام الله مش لعب عيال....................ثاني مشكله عندي بقي .........الناموس...............شوفولي حل في الناموس خلاص بجد زهقت منه غلبت اعمل ايه مافيش فايده بسبع ارواح ارش من هنا اجي بعد نص ساعه الاقيه زي ماهو ايه ده ناموس عامل زي الجاموس شوفولي حل عشان خاطري

كلام جميل

وبالنسبه لموضوع الناموس غيري نوع المبيد الي بتستعمليه كل اسبوع
لان الناموس خلال الاسبوع بيكون كون مناعه ضد الماده السامه الي في المبيد
لذا ينصح المتخصصون بتغير نوع المبيد كل اسبوع علي الاقل

ميرسي يا دكتور علي النصيحه الغاليه دي

ثانكس

اخى الاستاز على اعتقد انك كده بتشير لفكرتى واديك شايف ان المشروع ممكن يكون سهل يعنى سياده ريئس الوحده اهوة متفاعل بس دة طبعا لان ادارة المنتدى تفاعلت هل ده لان الاستاز على هو اللى طرح الفكرة بطريقه مختلفه ولا ايه بالضبط المهم فى الاول وفى الاخر يهمنى مصلحه البلد بطريقتى او بطرقتك احنا اخوات واكيد الهدف واحد بس مساده لفكرتك احنا ممكن نغير المكان يعنى احنا عندنا فى البلد البحر لما اتغطى اصبح ان فيه مساحه لا باس بها ممكن يقوم عليها اكتر من مشورع وبردة مكان البحر هو كان هدفى فى انشاء المشروع للشركه المساهمه نفسى بس حد يناقشنى فى المشروع والله سهل سهل سهل وارجوا من ادارة المنتدى الاهتمام والتفاعل وطرح الفكرة على الوحده المحليه

أجمل مافي الموضوع ياسادة الاخت اللي موش عارفة تنام بسبب الناموس مع ان الناموس دا حشرة ظريفه اوي وبعدين عدوانية الناموس اللي موجود دلوقتي قلت عن زمان بكتييييييييييييييييييير .ابقي استعملي اقراص طارد للناموس ظريفة ومريحة وهتخليكي تعرف تنامي كويس . المهم بالنسبة لموضوع المقابر وحكاية 10 سنين علشان تقدروا تنقلوا رفاة موتانا موش كتير 10 سنين .طيب ايه الفكرة خايفين حد يصحي تاني منهم ولا لازم الميت يموت ويشبع موت وبعدين ننقله وانا علي حد علمي ان المقابر دي ملك للناس يعني احنا اللي بنشتري الارض واحنا اللي بنبني ازاي تبقي توول ملكيتها للوحدة المحلية ووزارة الصحة انا خايف تفرضوا ضريبة عقارية علي المقابر بعد كدا وكل ميت زي مايطلع عليه يدفع ودمتم بصحة وعافية ويبعد عنكم جميع الامراض المعدية اللي ماشية في البلد اليومين دول ويجعله عامر والسلام عليكم ورحمة الله وبركاته

نعم اخى اوفقك الراى
تحياتى القبل المفقود