للكوسة في بلادي شئون

من طرف **ابراهيم نجاح** السبت يناير 19, 2008 4:09 pm

للكوسة في بلادي شئون

للكوسة في بلادي شئون
بتخلّي المسنود فرعون
يتفرعن فين مهما يكون
وتخلي الجاهل أستاذ
والأعرج لاعب جمباز
وتخلّي الأحول هداف
والكوره الآوت ف الجون
*********
للكوسة في بلادي شئون
لو تعرف واحد في الشرطة
راح تخرج من أجدع ورطة
والراجل اللي انت ظلمته
تلاقيه متلقّح مسجون
أو تعرف شخصية كبيرة
شغالة في البنك مديرة
راح تاخد من غير ضمانات
كام قرض بمليون مليون
وهروبك طبعا مضمون
*********
ويا عيني لو تعرف نايب
في المجلس مش نايب خايب
راح تبني أبراج وهمية
أوراقها مظبوطه أكيد
وفلوس الناس المهريّة
حتجيلك م الجيب للإيد
بعديها تروح المستشفى
وتقيّد نفسك مجنون
أحكامك تسقط في ساعتها
بعديها ترجع موزون
*********
وياعيني لو تعرف شيخ
فجنابك طاهر على طول
وصيامك طبعا مقبول
وإذا فرضا حبيت تتجوز
تتجوز من غير مأذون
وإذا ساكن في عمارة جديدة
وحبيبك راجل مسئول
فسيادتك من غير ما تقول
يركبلك فورا تليفون
*********
ولو انت عندك عربية
ونمرها سوده بنسرين
حتعدّي أجدعها كمين
وحتكسر أوضحها إشارة
ماهو نمرك سوده جبارة
ولا تعرف أيتها قانون
ولو انت بتعرف فرّان
أو واحد بياع جرنان
راح تاخد طلبك وحتمشي
من غير ولا دوشة ولا دور
والناس الغلبانة حتاخد
طلباتها بعدك وتغور
ماهو كله غيرك بيهون
*********
ولو انت زميل الحلاق
راح تحلق أولها زبون
وإذا كنت بتعرف دكتور
حتعيش متطمن مسرور
وحتسلك ف لجان الشفوي
ومجال تعيينك موفور
وحتطلع فالتليفزيون
بالبدلة وفيها الببيون
تتكلم وبكل بساطة
عن شرف المهنة المدفون

من طرف **عادل رمضان** الأحد يناير 20, 2008 8:51 am

الله عليك يا نجم فعلا الكوسه موجوده بس بيستخدموها للطبخ وكدا يعنى هاااااااااااااااااا

زعلان مالكوسة على إيه
دي الكوسة بتلاته جنيه
أسعارها دايما مدعومة
ولغتها علطول مفهومة
والخلطة فلفل وبطاطس
وتملحها بربع جنيه
ليه تزعل مالكوية ليـه
طب حاول تزعل ماللحمة
والعيش إللي وسط الزحمة
وقلوب خرجت منها الرحمة
وأنا مش عارف أقول لك إيه
بس سامحني علي أشعاري
والحيرة إللي في لون أفكاري
وكلامي إللي مش موزون
ده أنا جزار الشعر زبون
واللحمة ب ؟؟؟؟جنيه
ليه تزعل م الكوسة ليه

من طرف **totti** الثلاثاء يناير 22, 2008 11:42 pm

معرفش انك بتحب الكويه كده
بس هى قليقه الادب
ازاى تسيبك وتروح لحد تانى

زعلان مالكوسة على إيه
دي الكوسة بتلاته جنيه
أسعارها دايما مدعومة
ولغتها علطول مفهومة
والخلطة فلفل وبطاطس
وتملحها بربع جنيه
ليه تزعل م الكوسة ليـه
طب حاول تزعل ماللحمة
والعيش إللي وسط الزحمة
وقلوب خرجت منها الرحمة
وأنا مش عارف أقول لك إيه
بس سامحني علي أشعاري
والحيرة إللي في لون أفكاري
وكلامي إللي مش موزون
ده أنا جزار الشعر زبون
واللحمة ب ؟؟؟؟جنيه
ليه تزعل م الكوسة ليه

****خلاص يا عم توتي ماتزعلش إنت الغلط مردود والكوية رجعت لبيتها *****

من طرف **سندريلا** الخميس يناير 24, 2008 2:04 pm

هههههههههههههههههههههههههههههههههههههههههههههههه

كلام منسق اوى

واشمعنه الكوسه يعنى

ميرسى على الموضوع

من طرف **crazy-girl** السبت يناير 26, 2008 7:52 pm

[ندعوك للتسجيل في المنتدى أو التعريف بنفسك لمعاينة هذه الصورة]

ههههههههههههههههههههههههههه
الموضوع جميل
بس عندي سؤال
اشمعن الكوسه

[ندعوك للتسجيل في المنتدى أو التعريف بنفسك لمعاينة هذه الصورة]

جميل
بس أنا كده جعت
لأن أنا بحب الكوسه أوى
أنا جعاااااااااااااان

من طرف **دكتور محمد** السبت مايو 24, 2008 10:14 pm

فيما يتعلق بموضوع الكوسه في مصر
اتسأل عن سبب تسميتها بهذا الاسم وماذا كان من الممكن اكتشاف مصطلح اخر يعبر عن الواسطه وانتشارها في الوسط المصري

انه وعن تجارب شخصيه مررت بها ربما لم يتعرض لها الكثير من الناس اتضح لي ان الموضوع اصبح اكبر بكثير من ان يحتويه مصطلح كوسه

من طرف **على مجاهد** الأحد مايو 25, 2008 1:29 am

اختلفت المصادر في تحديد سبب التسمية
الشيء المشهور إن الكوسة دي اتسمت عشان جاية من التكوس ومعناه الشيىء المكوس يعنى اللى مش ماشى عدل ومكوس كده cheers

وفيه ناس بيقولوا عليها أرع علشان مقرعة وبرده مشيها مش عدل وعامل كدهه rendeer

لكن الشائع والوارد تاريخيا أنها دايما فى الطبيخ علشان بتستخبى و غالبا مهى عامله كدهوت geek

خلاص خلينا جد شوية
بيقولك أن سبب التسمية يا دكتور محمد تاريخى وهو أنه فى عام 1923 كان الخديوى سعيد زى ما احنا عارفين كان بيحب المكرونة وكانت عنده كاميريرا ايطالبة اسمها مس كوسيه وكانت الخدامة دى قصدى الكاميريرا عندها عيل مغلبها علطول بيسقط فى المدرسة ويتخانق العيال ويعمل مشاكل مع المدرسين وكل يوم تروح لحضرة الناظر تستعطفه عشان يرجع ابنها بس هوا مكانش بيوافق كتير جايز برضه عشان حضرة الناظر ده كان بيحب يلعب قمار والحقيقة كان دايما بيكسب وعمل قرش من ورا الترابيزات بس كان متجوز واحدة مطلعة عين أبوه وكانت كل يوم تاخد فلوسة وتديها لأخوها الصايع اللي كان بيصرفهم على الخمرة ويسكر بيهم المهم أخوها ده بالمناسبة وللصدفة يعني كان ناصب على رسام إيطالى برده والرسام ده كان عامل لوح مش أد كده ويرجع يبيعها
المهم علشان منخرجش عن الموضوع وللأمانة العلمية دا مكنش الخديوى اسماعيل دا كان الخديوى توفيق . . .لالالا الحقيقة كان عباس أويمكن محمد على نفسه لا لا أفتكرت هو كان فاروق والناس كانت بتسأف وبتقول بالروح بالدم نفديك يا فاروق لأنه كان قريب من الشعب الحقيقة واتجوز واحدة مش من العيلة المالكة وكان كل الناس بتحبه وكان بسيييييييط أبسط من البساطة وبيتمشى فى الشارع وباكل مع الخدم ملك ديمقراطى على حق . . .الله يرحمه
بس للأسف كان بتاع نسوان وخمرة بالمعنى الأصح كان ابن ستين فى سبعين وبعدين أصلا مش مصرى . . لأ الملك ده لازم يمشى والاستقلال التام أو الموت الزؤام
ولازم اللى يمسكنا يبقى مصرى زينا. . . الرئيس الشهم الراحل رحمة الله عليه جمال عبد الناصر . . .يا سلام السد العالى والإصلاح الزراعى والاتحاد الاشتراكى والثورة الصناعية حاجات عظيمة علشان الراجل ده مكنش بيهمه الموت ووقف زى السبع وقال إذا مات جمال عبد الناصر فكلكم جمال عبد الناصر وكفاية انه خلص الناس من الملك وظلم الملك دا كان ملك خائن وحاشية ظالمة . . . احسن حاجة نبقى اشتراكيين زى لينن واستالين بلا اقطاع بلا رأس مالية بلا بتاع
علشان كده قامت الناس سأفت برده وقالت بالروح بالدم نفديك يا جمال . . ومش عارف ايه نفيديك يا اسمك ايه .
وبعدين تيجى النكسة . . شباب زى الورد استشهدوا علشان كل واحد كان لازم ينسحب على مسئوليته الشخصية منهم لله اللى كانوا السبب وبرده رجعت الناس سأفت وقالت هنحارب بالروح بالدم نفد. . . .يا اسمك ايه . . . . واستغر الله العظيم . . . لا تتنحى
بعد كده بأه جه الرئيس المؤمن محمد أنور السادات الشهيد المحترم وقال ليست من حق أى قوى مهما كانت أن ترث جمال عبد الناصر إذا مات عبد الناصر فكلنا جمال عبد الناصر
بس الاتحاد الاشتراكى ده كان مراكز قوى متسلطة ووحشة وبلونة لازم تفرقع علشان اتسبب فى النكسة بتاعت
بس حياة أم اللى هيقول أنا اشتراكى هحطه فى العمبوكة
وعلشان أنا لى علامة صلاة هقولك ارفع شكواك يا عمر يا تلمسانى وهطلع الإخوان من السجون بس على شرط تفورولى العيال الشيوعيين اللى لا دين ولا ملة
الصراحة الكلام خيش فى دمغة الناس وهو كلام بعقل برده
والناس برده سأفت وقالت بالروح وباللالالا . . نفيدك يا اسمك ايه
ونكتفى بهذا القدر حيث أن وقت البرنامج قد انتهى. . .بدل ما نودى الناس فى داهية
وإلى اللقاء فى الحلقة القادمة والتى نناقش فيها طريقة عمل الكوسة بشكل جديد
من الجمبرى والاستاكوزا والكفيار والفليه والمانهاتونى
وكمان الدقة والملح والمش والعيش الحاف دا لو الغلابة لقوه
مع سلطة الخصخصة - مش قصدى حاجة طبعا - الخصخصة دى جاية من الخص
مع اعتقال مجموعة من البقدونس والفجل الرومى علشان يدارى الريحة
ودى هتبقى أكلة اسمها بيت العز - علشان كل حاجة هيبقى فيها عز
وكله سلطة فى سلطة . . .أى حاجة
ودا اللى وصلناله فى آخر الحدوته
وتوته توتة فرغت العمبوكة حلوة ولا مفكوكة

حلو الكلام ده أوي عن الكوسة يا علوة
وبصراحة إسم الكوسة على مسماها لأنها لما بتستوي بتبقى ملخبطة ومش باين فيها الكوسة من الطماطم
وكما قال الشاعر العظيم(((القرع لما استوى قال للخيار يالوبيا))تحياتي للأستاذ علي والدكتور محمد

يا عم انتم فتحتوا سوق خضار دة بيحب الكوسة وده عاوز طماطم وكمان اللحمة موجودة مفيش ناقص غير الملاعق والطبلية ونديها أكله يا حاج ابراهيم .
ومنتظر ابداعاتك اللى ديما لازم اقرأها .